വിവിധ കോടതികളിലായി കെട്ടിക്കിടക്കുന്ന കേസുകളുടെ എണ്ണം രണ്ട് മാസത്തിനുള്ളിൽ അഞ്ച് കോടിയിൽ എത്തുമെന്ന് നിയമമന്ത്രി കിരൺ റിജിജു ചൊവ്വാഴ്ച പറഞ്ഞു.ഇത്തരം കേസുകൾ സുപ്രീം കോടതിയിലും ഹൈക്കോടതികളിലും കുറഞ്ഞു വരാൻ സാധ്യതയുണ്ടെങ്കിലും കീഴ്‌ക്കോടതികളിലാണ് യഥാർത്ഥ വെല്ലുവിളിയെന്ന് അദ്ദേഹം പറഞ്ഞു.

ഒരു ചൊല്ലുണ്ട് “നീതി വൈകുന്നത് നീതി നിഷേധിക്കപ്പെടാൻ കാരണമാകുന്നു ” എന്ന്. കേസുകൾ വൻതോതിൽ കെട്ടിക്കിടക്കാനുള്ള പ്രധാന കാരണം അടിസ്ഥാന സൗകര്യങ്ങളുടെ അപര്യാപ്തതയാണ്, ഇത് കോടതികളുടെ അമിതഭാരത്തിന് കാരണമാകുന്നു. സമീപകാല സാമൂഹിക-സാമ്പത്തിക മുന്നേറ്റങ്ങളും അവകാശങ്ങളെക്കുറിച്ചുള്ള അവബോധവും നീതിക്കായി കോടതികളെ സമീപിക്കാൻ കൂടുതൽ ആളുകളെ പ്രേരിപ്പിച്ചു. കൂടാതെ പൗരന്മാരുടെ അവകാശങ്ങൾക്ക് വേണ്ടിയുള്ള PIL അഥവാ പൊതുതാൽപ്പര്യ ഹർജി കേസുകളുടെ എണ്ണത്തിലും വർധനവുണ്ടായി.. അതേ സമയം കോടതികളുടെ എണ്ണം കൂടിയില്ല, ജഡ്ജിമാരുടെ നിയമനം വർധിച്ചില്ല കൂനിന്മേൽ കുരു പോലെ കോടതികളുടെ അവധികളുടെ എണ്ണം കുറഞ്ഞില്ല, ദിവസേനയുള്ള പ്രവർത്തന സമയം കൂട്ടിയതുമില്ല. നീതിക്കായി ദാഹിക്കുന്ന സാധാരണക്കാരുടെ സങ്കടം ദിനം പ്രതി കൂടിവരുന്നു. ഇന്ത്യയിലെ ഏറ്റവും വലിയ വ്യവഹാര കക്ഷിയാണ് ഗവൺമെന്റ്, തീർപ്പാക്കാത്ത പകുതിയോളം കേസുകളുടെ ഉത്തരവാദിത്തം സർക്കാരിനാണ്. ചിലപ്പോൾ, ഒരു സർക്കാർ വകുപ്പ് മറ്റൊന്നിനെതിരെ കേസെടുക്കുന്നു, തീരുമാനമെടുക്കൽ കോടതികൾക്ക് വിട്ടുകൊടുക്കുന്നു. കേസുകളുടെ എണ്ണം കൂടുന്നതിന്റെ വലിയ ഒരു പ്രധാന കാരണം ഇതാണ്.

മികച്ച കഴിവുള്ള വിദ്യാർത്ഥികളെ ആകർഷിക്കുന്നതിൽ ഇന്ത്യൻ ജുഡീഷ്യറി പരാജയപ്പെട്ടു. കീഴ്‌ക്കോടതികളിലെ വിധികൾ എല്ലായ്‌പ്പോഴും നിലവാരം പുലർത്താത്തതിനാലോ തൃപ്തികരമല്ലാത്തതിനാലോ ഉയർന്ന കോടതികളിൽ ഇവരുടെ തീരുമാനങ്ങൾക്കെതിരെ അപ്പീലുകൾ ഫയൽ ചെയ്യപ്പെടുന്നു.ഇത് കേസുകളുടെ എണ്ണം വീണ്ടും വർദ്ധിപ്പിക്കുന്നു. ജഡ്ജിമാർക്ക് സ്പെഷ്യലൈസേഷൻ ഇല്ലാത്തതോ മടിയന്മാരായതോ ആകാം ഇത്തരം പ്രശ്നങ്ങളുടെ കാരണം എന്ന് ചിലരെങ്കിലും സംശയിക്കുന്നതിൽ തെറ്റ് പറയാൻ പറ്റില്ല. മറ്റൊരു കാരണം മോശം കരടിലൂടെയുള്ള നിയമങ്ങളുടെ അവ്യക്തതയാണ് . 1880 മുതലുള്ള നിയമങ്ങൾ പലതും ഇനിയും കാലോചിതമായി മാറ്റിയിട്ടില്ല.

ആത്യന്തികമായി, നമ്മുടെ ബഹുമാന്യരായ ജഡ്ജിമാർ തങ്ങളുടെ ഒഴിവുസമയങ്ങൾ രാഷ്ട്രത്തിന് എന്താണ് പ്രശ്‌നമുണ്ടാക്കുന്നതെന്ന് ചിന്തിക്കാൻ ഫലപ്രദമായി സമയം വിനിയോഗിക്കുകയാണെന്ന് ഞങ്ങൾ പറയും. രാഷ്ട്രം അവർക്ക് അതിനായി മതിയായ സമയം നൽകുന്നു.എന്നിരുന്നാലും, കേസുകൾ കെട്ടിക്കിടക്കുന്നതിന് നിരവധി ഘടകങ്ങളുണ്ട്. നിങ്ങൾക്കറിയാമോ? നിലവിൽ, സുപ്രീം കോടതിക്ക് ഒരു വർഷത്തിൽ ഏകദേശം 200 പ്രവൃത്തിദിനങ്ങളും ,ഹൈക്കോടതികൾക്കും 210 ദിവസങ്ങളും വിചാരണ കോടതികൾക്ക് 245 ദിവസവും ഉണ്ട്. സുപ്രീം കോടതിക്ക് അതിന്റെ വാർഷിക കലണ്ടറിൽ അഞ്ച് അവധികളുണ്ട്-45 ദിവസത്തെ വേനൽക്കാല അവധി, 15 ദിവസത്തെ ശൈത്യകാല അവധി, ഒരാഴ്ചത്തെ ഹോളി അവധി.

ഇതിനൊക്കെ ഒരു മാറ്റം വരുമെന്ന് നമുക്ക് പ്രതീക്ഷിക്കാം